LONDËR — Qëndrimi zgjuar deri në orët e vona të natës dhe preferenca për të qenë aktiv gjatë mbrëmjes mund të lidhet me një shëndet më të dobët kardiovaskular. Në këtë përfundim ka arritur një studim shkencor i bazuar në analizimin e të dhënave shëndetësore të më shumë se 300 mijë personave të moshës mesatare dhe të moshuar.

Sipas hulumtimit, rreth 8% e pjesëmarrësve e përshkruan veten si persona që funksionojnë më mirë në orët e vona. Ekspertët theksojnë se rreziku nuk vjen vetëm nga orari i fjetjes, por nga mospërputhja mes orës së brendshme biologjike të trupit dhe kërkesave të jetës së përditshme, si oraret e punës, ushqyerja dhe aktiviteti fizik.

Kjo mospërputhje prish ritmin cirkadian, i cili kontrollon jo vetëm ciklin e gjumit dhe të zgjimit, por edhe rrahjet e zemrës, presionin e gjakut, sekretimin e hormoneve të stresit dhe metabolizmin.

Mjekët dhe studiuesit e përfshirë në projekt sqarojnë se personat që preferojnë orët e vona nuk janë të paracaktuar të vuajnë nga zemra. Sfida kryesore për këtë kategori është gjetja e një rutine të qëndrueshme dhe përshtatja e ritmit biologjik me strukturën e përditshme.

Studimi përforcon rëndësinë e gjumit cilësor si një shtyllë kryesore të shëndetit të zemrës, krah ushqyerjes së shëndetshme, aktivitetit fizik dhe kontrollit të tensionit të gjakut. mesazhi kryesor i ekspertëve është se ruajtja e një orari të rregullt të gjumit dhe një rutine të qëndrueshme mbetet thelbësore për mbrojtjen e sistemit kardiovaskular.