TIRANË — Përballja sportive mes Shqipërisë dhe Bjellorusisë në stadiumin “Air Albania” u shoqërua me mesazhe të forta politike dhe shoqërore nga shkallët e tribunave, ku tifozët shpalosën disa banderola me ndikim të madh publik.

Në një prej tribunave të stadiumit u vu re një pankartë e madhe me thirrjen “Arrestoni Ramën”, e shoqëruar me grafikën e një flamingoje, simbol ky që po përdoret gjerësisht gjatë protestave të fundit opozitare dhe qytetare në kryeqytet.

Përveç zhvillimeve politike vendase, vëmendje të veçantë mori edhe reagimi i tifozërisë ndaj vendimit të fundit të Dhomave të Specializuara në Hagë, ku katër ish-drejtuesit e Ushtrisë Çlirimtare të Kosovës u dënuan me një total prej 81 vitesh burgim.

Në mbështetje të ish-krerëve të UÇK-së, mbështetësit kuqezinj ngritën banerin me mbishkrimin e madh: “Prangat e përkohshme, historia e përjetshme”.

Vendimi i gjykatës ndërkombëtare ka nxitur reagime të shumta në të gjitha trevat shqiptare, ndërsa shkallët e stadiumit shërbyen sërish si një platformë për përcjelljen e mesazheve kombëtare.