TIRANË — Shqipëria po konsolidon pozitën e saj në hartën e mbrojtjes ushtarake, duke u renditur në vendin e 8-të në botë për numrin e dronëve ushtarakë të marrë nga furnizuesit e huaj gjatë periudhës 2022–2025.

Sipas të dhënave të databazës prestigjioze SIPRI Arms Transfers Database, vendi ynë ka importuar gjithsej 56 dronë ushtarakë të klasit të lartë, duke përbërë rreth 0.3% të të gjithë totalit global prej 16,822 njësish të regjistruara në këtë katërvjeçar.

Në nivel rajonal, Shqipëria udhëheq me një diferencë të dukshme ndaj fqinjëve të saj. Serbia renditet në vendin e 21-të globalisht me vetëm 10 dronë të importuar (mbi 5 herë më pak se Shqipëria), ndërsa Kosova zë vendin e 34-të me 5 dronë ushtarakë (mbi 11 herë më pak).

Këto shifra të SIPRI-t fokusohen te sistemet e mëdha ushtarake me peshë mbi 150 kilogramë si dhe te municionet bredhëse (dronët kamikazë), duke lënë jashtë dronët e vegjël tregtarë apo ata FPV.

Lufta në Ukrainë dhe dominimi prej 91% i tregut global Tregtia ndërkombëtare e teknologjisë ushtarake pa pilot gjatë viteve të fundit është përqendruar pothuajse tërësisht në konfliktin mes Ukrainës dhe Rusisë.

Të dhënat tregojnë se Ukraina mban vendin e parë absolut duke importuar 8,664 dronë ushtarakë (51.5% të totalit botëror), e ndjekur nga Rusia me 6,720 dronë (39.9%). Së bashku, këto dy shtete përfaqësojnë mbi 91% të të gjithë importeve globale të regjistruara në këtë sektor.

Në renditjen globale pas këtyre dy vendeve në luftë, Tajvani zë vendin e tretë me 291 dronë, i ndjekur nga Koreja e Jugut me 190, Azerbajxhani me 154, India me 119 dhe Gjeorgjia me 100. Shqipëria renditet e 8-ta me 56 dronë, duke lënë pas vende anëtare të NATO-s si Hungaria dhe Lituania, të cilat numërojnë nga 50 dronë secila.

Ukraina i ka siguruar rreth 83% të dronëve të saj nga sistemet amerikane. Nga ana tjetër, importet ruse u përkisnin kryesisht Iranit me modelet Shahed-136, teknologji kjo që Rusia tashmë po e prodhon vetë në linjat e saj nën emërtimin Geran-2.

Kufizimet e statistikave dhe realiteti i dronëve të vegjël Ekspertët e SIPRI-t nënvizojnë se shifrat e tyre pasqyrojnë vetëm "sistemet e mëdha" ushtarake. Përdorimi i dronëve të vegjël dhe ekonomikë FPV në vijën e frontit është shumë herë më i madh.

Për shembull, vetëm Mbretëria e Bashkuar ka dërguar mbi 85,000 dronë të vegjël ushtarakë në Ukrainë brenda vetëm 6 muajsh, numër ky që kalon disa herë totalin e importeve të regjistruara globale prej 16,822 njësish.

Po ashtu, statistikat e importit nuk përfshijnë prodhimin vendas. Industria ukrainase e mbrojtjes ka arritur kapacitetin për të prodhuar mbi 8 milionë dronë FPV në vit, ndërsa Rusia vlerësohet se prodhon rreth 2,800 dronë Geran-2 çdo muaj