TIRANË — Gazetari Bledi Mane ka qenë i ftuar në emisionin “She’s On Air” në Top Albania Radio, ku gjatë bisedës në studio ka ndarë sugjerimet e tij për personazhet publike që do të dëshironte t’i shihte si banorë në edicionin e ardhshëm të formatit “Big Brother VIP”.

Gjatë intervistës me moderatoren Stelina, Mane veçoi gazetarin Milaim Zeka si një nga figurat ideale për t’u bërë pjesë e shtëpisë, duke e cilësuar atë si një nga personazhet më kontroversë që do t’i pranonte me kënaqësi ftesat e këtij lloji. Më tej, ai propozoi emrin e Helga Cakos, vajzës së konspiracionistit Alfred Cako, duke theksuar se përveç profilut të saj publik e qytetar, prania e saj do të nxiste edhe diskutime dinamike në panelet televizive nga i ati.

Një tjetër emër i propozuar nga gazetari ishte edhe ai i deputetit Erion Braçe. Mane u shpreh se prania e një politikani si Braçe do të shpërfaqte anën njerëzore të njerëzve të politikës, duke e përshkruar atë si një personazh që i shkon debatit deri në fund dhe që mbetet besnik i ideve të veta.

Lidhur me mundësinë e një rikthimi të tij personal brenda shtëpisë së “Big Brother VIP”, Bledi Mane e përjashtoi si mundësi, duke nëvizuar se publiku ka nevojë për fytyra dhe karaktere të reja në ekran.