SHËN PETERSBURG — Presidenti i Rusisë, Vladimir Putin, ka mohuar se Moska po planifikon veprime ushtarake kundër vendeve evropiane, duke i cilësuar paralajmërimet për një kërcënim të mundshëm rus si përpjekje të qëllimshme për të rritur tensionet në kontinent.

Gjatë një prononcimi për mediat në kuadër të Forumit të 12-të të Kulturave të Bashkuara në Shën Petersburg, Putin deklaroi se disa vende evropiane po e paraqesin Rusinë si rrezik sigurie për të arsyetuar vazhdimin e shpenzimeve dhe mbështetjes ushtarake ndaj Ukrainës. Kreu i Kremlinit akuzoi ato që i quajti “qarqe agresive” në Evropë se po e përdorin Ukrainën si instrument për të frenuar zhvillimin e Rusisë.

Duke komentuar deklaratat e ministrit estonez të Mbrojtjes, Hanno Pevkur, si dhe diskutimet mbi mundësinë e një goditjeje parandaluese ndaj Rusisë, Putin i cilësoi ato si qëndrime provokuese. Ai reagoi ndaj këtyre diskutimeve duke deklaruar se “cirku është larguar, por kllounët kanë mbetur”.

Lidhur me mundësinë e rikthimit në negociatat e paqes me Kievin, presidenti rus theksoi se çdo vendim i Moskës do të merret duke pasur parasysh vetëm interesat e Rusisë. Ai pretendoi se ndonëse pala ukrainase ka ngritur çështjen e një armëpushimi në infrastrukturën energjetike dhe Detin e Zi, ajo vijon operacionet ushtarake kundër objektivave ruse.

Gjithashtu, Putin u ndal te sulmet e fundit në territorin rus, përfshirë goditjen ndaj Moskës më 20 shtator. Ai pohoi se përgjigja ushtarake e Rusisë ndaj këtyre veprimeve ka qenë e ndjeshme dhe shkatërruese për forcat ukrainase, duke përsëritur në përfundim se pretendimet për një sulm të mundshëm rus ndaj Evropës janë absurditet i plotë.