TIRANË — Eric Wendt ka mbërritur sot në Pallatin e Brigadave për t’i dorëzuar letrat kredenciale Presidentit të Republikës, duke nisur kështu zyrtarisht misionin e tij diplomatik si Ambasador i Jashtëzakonshëm dhe i Fuqishëm me Kompetencë i Shteteve të Bashkuara të Amerikës në Shqipëri.

Mbërritja e tij në Tiranë një ditë më parë dhe ceremonia zyrtare në Presidencë shënojnë fundin e një periudhe thuajse trevjeçare gjatë së cilës misioni diplomatik amerikan në Shqipëri drejtohej me të ngarkuar me punë, pa një ambasador të konfirmuar.

Ambasadori Wendt u propozua për këtë post nga Presidenti i SHBA-së, Donald Trump, dhe mori konfirmimin përfundimtar nga Senati Amerikan më 6 gusht.

Diplomati i ri i Uashingtonit vjen në Shqipëri me një karrierë më shumë se 34-vjeçare në ushtrinë amerikane dhe fushën e sigurisë kombëtare. Ai ka shërbyer gjatë në radhët e Forcave Speciale “Green Berets” dhe ka drejtuar më parë Komandën e Operacioneve Speciale të NATO-s, përvojë kjo që e lidh profilin e tij profesional me çështjet e sigurisë dhe mbrojtjes në kuadër të Aleancës Veriatlantike.

Dorëzimi formal i kredencialeve zyrtarizon fillimin e plotë të veprimtarisë së tij diplomatike në krye të Ambasadës së SHBA-së në Tiranë.