TIRANË — Policia e Shtetit dhe Byroja Kombëtare e Hetimit, nën drejtimin e Prokurorisë së Posaçme Kundër Korrupsionit dhe Krimit të Organizuar (SPAK), kanë finalizuar operacionin policor të koduar “Muri i Lartë”. Aksioni u zhvillua për ekzekutimin e masave të sigurisë ndaj anëtarëve të një grupi të strukturuar kriminal të përfshirë në trafikun e lëndëve narkotike.

Në kuadër të këtij operacioni, Forcat Speciale RENEA, Drejtoria e Forcës së Posaçme Operacionale dhe shërbimet hetimore arrestuan në orët e para të mëngjesit në Shkodër shtetasin 50-vjeçar Bledar Çafi. Ndaj tij, Gjykata e Posaçme e Shkallës së Parë për Korrupsionin dhe Krimin e Organizuar (GJKKO) ka caktuar masën e sigurisë “Arrest me burg” për veprat penale të trafikimit të narkotikëve në kuadër të grupit të strukturuar kriminal.

Paralelisht, në zbatim të vendimit të GJKKO-së, nga strukturat e policisë u ushtruan kontrolle të imtësishme në banesat dhe ambientet në pronësi të shtetasit Indrit Dokle (Endrit Dokle), 43 vjeç, lindur në Kukës dhe banues në Tiranë. Dokle ndodhet në kërkim ndërkombëtar që prej vitit 2024 për të njëjtat akuzat të lidhura me trafikun e drogës dhe organizimin e grupit kriminal.

Gjatë kontrolleve të ushtruara në terren, 43-vjeçari nuk u gjet në ambientet e kërkuara. Policia e Shtetit dhe BKH njoftojnë se puna po vijon intensivisht për lokalizimin dhe kapjen e tij.

Njoftimi i policisë:

Finalizohet operacioni policor i koduar “Muri i Lartë”.

Operacioni nga Policia e Shtetit në bashkëpunim me BKH-në, nën drejtimin e SPAK.

Kapet dhe vihet në pranga një shtetas me rrezikshmëri të lartë shoqërore.

Vijon puna për kapjen e një shtetasi tjetër, i cili gjatë operacionit nuk u gjet në banesë.

Strukturat operacionale dhe hetimore të Policisë së Shtetit, konkretisht Forcat Speciale Renea, Drejtoria e Forcës së Posaçme Operacionale, Drejtoria për Hetimin e Narkotikëve, DVP Shkodër dhe BKH, nën drejtimin e SPAK, në zbatim të urdhrit të Prokurorisë së Posaçme SPAK dhe të vendimit të Gjykatës, kanë zhvilluar dhe finalizuar operacionin policor të koduar “Muri i Lartë”, me qëllim ekzekutimin e masës së sigurimit personal ndaj një shtetasi, si dhe kryerjen e kontrolleve për lokalizimin dhe kapjen e një shtetasi tjetër, i shpallur në kërkim.

Në kuadër të operacionit, në Shkodër u bë e mundur kapja dhe arrestimi i shtetasit B. C., 50 vjeç, lindur dhe banues në Shkodër, person me rrezikshmëri të lartë shoqërore.

Kapja dhe arrestimi i tij u bë në orët e para të mëngjesit të sotëm, në banesën e tij në Shkodër. Gjykata e Posaçme e Shkallës së Parë për Korrupsionin dhe Krimin e Organizuar, më datë 25.09.2026, ka caktuar për këtë shtetas masën e sigurimit personal “Arrest me burg” për veprat penale “Trafikim i lëndëve narkotike”, kryer në bashkëpunim, në formë të grupit të strukturuar kriminal, si dhe “Grup i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”.

Po në zbatim të vendimit të GJKKO-së, u ushtrua kontroll në vendet që i përkasin shtetasit në kërkim E. D., alias I. D., 43 vjeç, lindur në Kukës dhe banues në Tiranë, person në kërkim që prej vitit 2024, për të cilin GJKKO ka caktuar masën e sigurisë “Arrest me burg” për veprat penale “Trafikim i lëndëve narkotike”, kryer në bashkëpunim, në formë të grupit të strukturuar kriminal, si dhe “Grup i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”.

Gjatë kontrolleve, ky shtetas nuk u gjet dhe vijon puna për lokalizimin dhe kapjen e tij.