TIRANË — Tre motra trinjake nga qyteti i Kukësit kanë nisur rrugëtimin e tyre universitar në Fakultetin e Mjekësisë në Tiranë, duke vendosur të vazhdojnë studimet në të njëjtën degë për të mos u ndarë nga njëra-tjetra.

Edhe pse në preferencat e tyre individuale përfshihej edhe dega e Stomatologjisë, të tria motrat vendosën përfundimisht të regjistroheshin në degën e Farmacisë, me qëllim që të jenë bashkë edhe gjatë viteve të arsimit të lartë. Të tria ato kanë përfunduar arsimin e mesëm me rezultate të shkëlqyera në gjimnazin e Kukësit, duke shfaqur prirje të njëjta drejt shkencave ekzakte.

Pavarësisht lidhjes së fortë që i bashkon që nga lindja dhe në bankat e shkollës, motrat tregojnë se kanë karaktere të ndryshme nga njëra-tjetra. Njëra prej tyre, Ajseli, shprehet se është më e shkathët në komunikim, ndërsa motrat e tjera preferojnë një rreth më të ngushtë shoqëror.