RINAS — Një shtetas ukrainas 53-vjeçar, i shpallur në kërkim ndërkombëtar nga autoritetet ligjzbatuese të Kievit për trafikim të lëndëve narkotike në kuadër të një organizate kriminale, është arrestuar në Aeroportin Ndërkombëtar të Rinasit.

Arrestimi i shtetasit Anatolii Streletskyi u realizua në momentin që ai zbriti në territorin shqiptar, si rezultat i shkëmbimit në kohë reale të informacioneve mes Njësisë së Shërbimeve të Përbashkëta Investigative në Departamentin e Policisë Kriminale, Komisariatit të Policisë Kufitare Rinas dhe Njësisë së Hetimeve Ndërkombëtare Federale DSS/OCIU pranë Ambasadës së SHBA-së në Tiranë.

Policia e Shtetit bën me dije se po vijon punën e përbashkët me agjencitë partnere për dokumentimin e plotë të veprimtarisë së këtij anëtari të organizatës kriminale.

Ndërkohë, zyra e Interpol Tiranës ka nisur procedurat zyrtare në bashkëpunim me homologët ukrainas me qëllim ekstradimin e 53-vjeçarit drejt Ukrainës.

Autoritetet shqiptare kanë falënderuar agjencitë partnere ndërkombëtare për bashkëpunimin e vazhdueshëm në shkëmbimin e të dhënave operative.