ATHINË — Një ngjarje e rëndë ka tronditur kryeqytetin grek mbrëmjen e së premtes, ku një sulm me armë zjarri ndaj një kafeneje në lagjen “Agios Panteleimona” ka lënë të plagosur një fëmijë të mitur me origjinë shqiptare.

Ngjarja ka ndodhur rreth orës 23:50 sipas orës lokale, kur një automjet me katër persona ende të paidentifikuar i është afruar një lokalizmi në rrugën “Agorakritou” dhe ka hapur menjëherë zjarr me breshëri. Si pasojë e të të shtënave, një vajzë 10-vjeçare ka mbetur e lënduar në këmbë, ndërsa autoritetet greke po hetojnë nëse dëmtimi është shkaktuar drejtpërdrejt nga plumbat apo nga mbetjet e objekteve të dëmtuara nga goditjet.

Në momentin e atentatit, brenda ambientit të kafenesë ndodheshin 10 persona, të gjithë me kombësi shqiptare. Nëna e të miturës e ka transportuar vetë me urgjencë vajzën e saj drejt Spitalit të Fëmijëve “Aglaia Kyriakou”, pa pritur mbërritjen e ambulancës.

Pak kohë pas sulmit, forcat e policisë kanë gjetur një automjet të djegur të braktisur në një zonë pranë, i cili dyshohet se është përdorur nga autorët për t’u larguar nga vendngjarja. Grupi hetimor ka rrethuar zonën dhe po punon intensivisht për zbardhjen e motivit dhe identifikimin e katër personave të përfshirë në këtë ngjarje.