MYNIH — Dokumente të reja arkivore të zbuluara së fundmi kanë ngritur dyshime të forta mbi njërën nga ngjarjet më enigmatike të shekullit të kaluar, duke sugjeruar se Adolf Hitleri mund të ketë qenë i përfshirë në vrasjen e mbesës së tij, Angela "Geli" Raubal, e cila u gjet e vdekur në apartamentin e tij në Mynih në vitin 1931.

Ngjarja e bujshme, e cila në atë kohë u mbyll zyrtarisht si vetëvrasje, ndodhi kur 23-vjeçarja u gjet pa jetë me një plagë armë zjarri në gjoks, të shkaktuar nga pistoleta personale e vetë Hitlerit. Versioni zyrtar i kohës pretendonte se diktatori i ardhshëm – i cili në atë periudhë po merrte famë por nuk kishte marrë ende pushtetin – ishte nisur drejt Nurembergut një ditë para ngjarjes, duke ndërtuar kështu një alibi të fortë.

Megjithatë, historiani gjerman Harold Sandner ka zbuluar një detaj kyç në regjistrin zyrtar të vdekjeve në Mynih, ku data dhe ora e gjetjes së trupit figurojnë më 18 shtator 1931, në orën 10:15 të mëngjesit. Kjo datë konfirmohet edhe nga dy njoftime vdekjeje të gjetura në arkiva, çka e zhvendos kohën e ngjarjes me rreth 24 orë më herët se sa besohej deri më sot.

Nëse këto dokumente janë autentike, ato vërtetojnë se Hitleri ndodhej ende në Mynih kur u zbulua trupi i pajetë i të resë, pasi të dhënat e udhëtimit tregojnë se ai u nis për në Nuremberg vetëm pasditen e 18 shtatorit. Sipas historianit Sandner, kjo mospërputhje kohore tregon për një mbulim të mundshëm të krimit nga zyrtarë policorë që simpatizonin Partinë Naziste.

Gjetjet e reja, të cilat u publikuan fillimisht nga revista gjermane Der Spiegel, do të detajohen në librin e ri të Sandner me titull “Vdekja e Angela ‘Geli’ Raubal: Vetëvrasje apo lojë e ndyrë?”.

Besueshmëria e hulumtimit është konfirmuar edhe nga Thomas Weber, ekspert i njohur i historisë së Gjermanisë naziste, i cili u shpreh për CNN se Sandner është një studiues "jashtëzakonisht i përpiktë" dhe se dokumentet e paraqitura prej tij janë plotësisht të besueshme.

Shumë historianë mbështesin tezën se Hitleri ishte i fiksuar pas mbesës së tij dhe ushtronte një kontroll ekstrem ndaj saj. Pak para ngjarjes tragjike, ata kishin pasur një debat të ashpër për shkak se 23-vjeçarja dëshironte të transferohej në Vjenë për të studiuar muzikë. Ndonëse dokumentet e reja nuk e zgjidhin përfundimisht shkakun e vdekjes, ato rihapin pas pothuajse një shekulli pyetjet mbi atë që ka ndodhur me të vërtetë brenda apartamentit të Hitlerit.