MADRID — Legjenda e futbollit botëror, Roberto Carlos, ka tronditur opinionin publik me një rrëfim të rrallë mbi anën e errët të suksesit dhe parave, duke zbuluar se si humbi pothuajse të gjithë pasurinë e tij të fituar gjatë karrierës brenda vetëm 24 orëve.

Pavarësisht viteve të lavdishme me fanellën e Real Madridit dhe kombëtares braziliane, ku fitoi çdo trofe të mundshëm e vendosi pasuri marramendëse, ish-mbrojtësi i krahut të majtë u përball me një makth të vërtetë financiar jashtë fushave të blerta. Përplasja me një ish-agjent të tij, e ndërthurur me një krizë të rëndë familjare, e çoi atë buzë greminës ekonomike.

I pyetur mbi këtë periudhë dramatike të jetës së tij, Roberto Carlos u shpreh: “Pata një problem serioz me një ish-agjentin tim, shoqëruar me një telash shumë të madh familjar. Të enjten shkova në shtrat në mesnatë, ndërsa të premten në mëngjes u zgjova përballë një pirgu me letra, ekzistencën e të cilave nuk e dija. Aty humba çdo kontroll mbi historinë time, mbi gjithçka që kisha ndërtuar në futboll. Brenda një dite humba 99% të gjithçkaje që kisha fituar. Më pas, fatmirësisht, ia dola të ristrukturoja situatën time financiare dhe atë familjare.”

Rënia e befasishme kërkoi vendime drastike dhe forcë karakteri për t’u përballur me malin e detyrimeve ligjore e financiare që i dolën përpara. Megjithatë, siç konfirmon edhe vetë kampioni brazilian, pas një pune të gjatë ristrukturimi, ai arriti të rirestauronte ekuilibrat e tij financiarë dhe të rikthente qetësinë në jetën familjare.