PARIS — Franca ka finalizuar një marrëveshje strategjike ushtarake me Arabinë Saudite për vendosjen e trupave, radarëve dhe sistemeve të mbrojtjes ajrore në territorin e mbretërisë, me fokus të veçantë mbrojtjen e portit strategjik të Yanbu-së në Detin e Kuq.

Lajmi u bë i ditur nga vetë presidenti francez Emmanuel Macron, i cili sqaroi se ky hapi ushtarak vjen për të garantuar sigurinë e një prej nyjave më të rëndësishme të transportit të energjisë në botë në një moment tensionesh të larta rajonale.

Lidhur me këtë vendim, presidenti Macron deklaroi: “Ne kemi finalizuar një marrëveshje me sauditët për të vendosur asete ushtarake, që do të thotë trupa, radarë dhe sisteme mbrojtëse, për të mbrojtur këtë vend, jo për t’u përfshirë në konflikt, por për të mbrojtur vendin.”

Përveç zhvillimeve ushtarake në Lindjen e Mesme, kreu i Elysee-së u ndal edhe te kriza e çmimeve të energjisë dhe debati në Shtetet e Bashkuara për kufizimin e eksporteve të naftës. Macron zbuloi propozimin që synon t’i parashtrojë Uashingtonit për të stabilizuar tregjet globale.

I pyetur mbi këtë çështje, Macron tha: “Çfarë do t’i propozoj Trump? Pikërisht që ne, kombet dhe ekonomitë kryesore të njohura si G7, të ulemi së bashku nëse duam të ulim çmimet për vendet tona, ndoshta duhet të shqyrtojmë lirimin e rezervave strategjike në një mënyrë të koordinuar. Kjo do të rriste furnizimin e tregut dhe do të ulte çmimet.”

Në përmbyllje të prononcimit të tij, kreu i shtetit francez hodhi poshtë pretendimet se inteligjenca amerikane kishte paralajmëruar Parisin për një sulm të mundshëm rus ndaj Evropës Jugore apo vetë Francës. Megjithatë, ai ngriti alarmin se Moska po rrit veprimet armiqësore në territorin evropian dhe se vendi i tij mbetet vigjilent ndaj kërcënimeve të ngjashme me incidentet e fundit të dështuara në infrastrukturën evropiane.