NEW YORK — Përdorimi i Inteligjencës Artificiale dhe impakti i saj në sigurinë globale e perceptimin e realitetit ishin në qendër të fjalës së kryeministrit Edi Rama gjatë punimeve të Asamblesë së Përgjithshme të Kombeve të Bashkuara.

Në fjalën e tij para udhëheqësve botërorë, kreu i qeverisë bëri një paralele mes revulucionit të sotëm teknologjik dhe kthesave të mëdha historike në fushën e armatimeve e shkencës. Nëse në të kaluarën baruti ndryshoi konceptin e betejave ushtarake dhe energjia bërthamore riformësoi nocionin e mbijetesës, teknologjia e re po ndërhyn në një truall shumë më delikat, atë të formimit të mendimit dhe perceptimit njerëzor.

Kreu i ekzekutivit theksoi se kanali më delikat i cënueshmërisë lidhet me fabrikimin e realiteteve paralele të përshtatura sipas frikërave individuale. Sipas tij, kërcënimi kryesor që i kanoset shoqërisë moderne nuk buron nga frika se teknologjia do të frenojë progresin, por nga rreziku real që ajo të shfrytëzohet për të bindur e orientuar njerëzit e gabuar.

Duke u ndalur te përvoja e Shqipërisë, u nënvizua se ndonëse vendi nuk renditet mes fuqive teknologjike, po përballet drejtpërdrejt me sfida dhe zbatime praktike që në shumë vende të tjera mbeten ende pjesë e debateve teorike.

Në përmbyllje të fjalës, u ngrit alarmueshëm shqetësimi mbi përdorimin e këtyre sistemeve për disinformim masiv, destabilizim të debatit publik dhe vënien e tyre në shërbim të mekanizmave ushtarakë apo interesave të caktuara gjeopolitike.