TIRANË — Gjykata e Posaçme e Shkallës së Parë për Korrupsionin dhe Krimi e Organizuar (GJKKO) ka konfirmuar masën e sigurimit "arrest në burg" për Hasan Ndërjakun, i cili u ekstradua dy ditë më parë nga Italia drejt Shqipërisë. Ndërjaku ishte shpallur në kërkim në kuadër të operacionit të koduar “Ura”, ku ndaj tij ishte caktuar masa e arrestit në mungesë për vepra penale në kuadër të grupit të strukturuar kriminal. Pas ndalimit në Itali, ai kishte qëndruar nën masën e arrestit në shtëpi deri në realizimin e procedurave të dorëzimit.

Gjatë seancës gjyqësore të zhvilluar këtë të premte, avokati mbrojtës Rigert Koni kërkoi nga gjykata që në fashikull të administrohej vendimi i autoriteteve italiane të drejtësisë, i cili përcakton kushtet dhe kufijtë ligjorë të ekstradimit.

Sipas mbrojtjes, vendimi i gjykatës italiane nuk ndodhej në dosjen e prokurorisë dhe as të gjykatës shqiptare, ndërsa avokati pretendoi se autoritetet italiane nuk e kanë miratuar ekstradimin për akuzën e “grupit të strukturuar kriminal”, por vetëm për veprën penale të shitjes së lëndëve narkotike. Përkundrejt pretendimeve të mbrojtjes, Gjykata e Posaçme vendosi lënien në fuqi të masës “arrest në burg” për të pandehurin.