Ekzekutivja e shkarkuar nga një kompani e inteligjencës artificiale pasi fjeti në një sauna gjatë një udhëtimi pune ku kishte konsumuar alkool, mund të përfitojë një dëmshpërblim rekord prej 76 milionë paundësh. Shannon Burns, inxhiniere e lartë në fushën e teknologjisë, fitoi një çështje për diskriminim për shkak të aftësisë së kufizuar kundër kompanisë Gitpod, e cila tashmë është në pronësi të OpenAI, kompanisë që qëndron pas ChatGPT. Ajo ishte pushuar nga puna nga kompania e teknologjisë pasi humbi çelësin e dhomës së hotelit dhe u detyrua të flinte në një sauna.

Shannon, e cila kishte një pagë vjetore prej 220 mijë paundësh, u pushua nga puna më shumë se tre vjet më parë, por ende po përballet me procesin ligjor për të marrë dëmshpërblimin. Ish-zëvendëspresidentja e inxhinierisë ka zhvilluar çrregullim të stresit post-traumatik pas shkarkimit dhe është detyruar të largohet përfundimisht nga karriera në sektorin e teknologjisë. Ajo kërkon 76 milionë paund, bazuar në llogaritje “forenzike” të të ardhurave që mund të kishte siguruar në këtë industri jashtëzakonisht fitimprurëse.

Gitpod u përpoq ta kufizonte shumën që ajo mund të kërkonte në 1 milion paund, përmes një kërkese ligjore të cilën avokatët e saj e përshkruan si “shtypëse”. Por Gjykata e Punës në Birmingham e ka rrëzuar këtë kërkesë, duke i hapur rrugë Shannonit që të kërkojë zyrtarisht 76,071,992 paund dëmshpërblim. Gitpod është urdhëruar gjithashtu t’i bëjë të ditur Shannonit se sa ishte vlera e shitjes së fundit të kompanisë te OpenAI. Kompania nuk i kishte treguar asaj shumën për të cilën ishte shitur, edhe pse ajo zotëron aksione në kompani. Këto aksione mendohet se kanë një vlerë prej 2.6 milionë paundësh dhe mund të arrijnë deri në 21 milionë paund pas katër vitesh.

Aktualisht, dëmshpërblimi më i madh i njohur në historinë e gjykatave të punës në Mbretërinë e Bashkuar është 4.58 milionë paund. Gjykata kishte dëgjuar më herët se Shannon konsiderohej një “pioniere” në industrinë e teknologjisë dhe kishte punuar për kompani të Silicon Valley-t, përfshirë Slack dhe Lyft.

Ajo u rekrutua nga Gitpod në fund të vitit 2022 dhe u emërua në postin drejtues të Zëvendëspresidentes së Inxhinierisë, me një pagë prej 220 mijë paundësh dhe një bonus vjetor prej 78 mijë paundësh. Shannon, e cila ka ADHD, mori pjesë në një aktivitet pune për forcimin e ekipit në Lofer të Austrisë, në prill 2023. CEO i kompanisë, Johannes Landgraf, dhe punonjës të tjerë konsumuan alkool gjatë udhëtimit. Një mbrëmje, Shannon, e cila kishte konsumuar gjithashtu alkool, nuk mundi të hynte në dhomën e saj pasi kishte harruar çelësin. Sipas dëshmive në gjykatë, ADHD-ja e saj i shkaktonte “harresë të konsiderueshme” dhe ajo humbiste vazhdimisht sendet.

Atë natë, ajo përfundoi duke fjetur në një sauna. Kjo bëri që CEO-ja, Landgraf, të shprehte shqetësimin e tij për “mungesën e përgjegjshmërisë profesionale” së saj. Shannon u pushua nga puna në qershor 2023 dhe më vonë deklaroi para gjykatës: “Kolegët e mi meshkuj konsumonin alkool dhe deheshin gjatë aktivitetit të kompanisë, por unë isha e vetmja që u pushova nga puna.” Vitin e kaluar, Gjykata e Punës në Birmingham vendosi se Shannon ishte pushuar nga puna si pasojë e aftësive të saj të kufizuara dhe ajo fitoi çështjen për diskriminim.

Ajo po kërkon 76 milionë paund, bazuar në llogaritjet e paraqitura në dokumentin e saj për humbjet, ku vlerësohet se sa të ardhura mund të kishte siguruar gjatë karrierës së saj. Për shkak të pagës së lartë që kishte dhe fitimeve të mëdha në industrinë e teknologjisë, humbjet e saj të ardhshme janë vlerësuar në më shumë se 59 milionë paund. Pjesa tjetër e shumës prej 76 milionë paundësh përfshin kompensimin për dëmtimin emocional dhe atë që njihet si “ACAS Uplift”, një rritje e mundshme e dëmshpërblimit për mosrespektimin e procedurave përkatëse.

Në seancën e fundit në Birmingham, Gitpod kërkoi që kërkesa e saj prej 76 milionë paundësh të kufizohej në 1 milion paund. Kompania argumentoi se kërkesa e Shannonit për më shumë se 76 milionë paund ishte “e jashtëzakonshme”, duke shtuar se argumentet e paraqitura në dokumentin për humbjet ishin “absurditet i dukshëm”. Gjykatësja e Punës, Rachel Wedderspoon, e rrëzoi kërkesën.