DURRËS — Gjykata e Shkallës së Parë e Juridiksionit të Përgjithshëm Durrës ka ndryshuar masën e sigurisë për ish-drejtoreshën e Postës Shqiptare në Durrës, Elisabeta Mataj, duke zëvendësuar masën “arrest në burg” me atë të “arrestit në shtëpi”.

Vendimi u mor gjatë seancës gjyqësore të zhvilluar mëngjesin e kësaj të premteje (25 shtator 2026), nën drejtimin e gjyqtarit Xhevdet Lika dhe me pjesëmarrjen e prokurorit Gazmend Frëngu.

Sipas burimeve nga grupi hetimor, në zbutjen e masës së sigurisë kanë ndikuar prova të reja të administruara gjatë hetimit, midis të cilave një akt ekspertize grafike për falsifikim firme si dhe dëshmi të reja që po i japin çështjes një tjetër rrjedhë procedurale.

Sipas vendimit zyrtar të gjykatës:

Pranohet kërkesa e personit nën hetim Elisabeta Mataj.

Ndryshohet masa nga “arrest në burg” (e caktuar më 18 korrik 2026) në “arrest në shtëpi”.

Urdhërohet lirimi i menjëhershëm i saj nga dhomat e paraburgimit, me kusht që të mos largohet nga banesa e saj në qytetin e Durrësit.

Ekzekutimi i këtij vendimi i ngarkohet Prokurorisë dhe Policisë Gjyqësore, ndërsa palët kanë të drejtën e ankimit brenda 5 ditëve në Gjykatën e Apelit të Juridiksionit të Përgjithshëm Tiranë.