PATOS — Një grup intelektualësh, aktorësh, avokatësh dhe shkrimtarësh i janë drejtuar zyrtarisht Kuvendit të Shqipërisë, Komisionit të Posaçëm Parlamentar për Reformën Administrativo-Territoriale dhe grupeve parlamentare me një letër të hapur, ku shprehin kundërshtimin e tyre lidhur me propozimin për shkrirjen e Bashkisë Patos dhe bashkimin e saj me Fierin.

Përmes kësaj parashtrese, nënshkruesit kërkojnë që përpara çdo vendimmarrjeje politike apo administrative të kryhet dhe të bëhet publike një analizë e plotë, e verifikueshme dhe objektive mbi kapacitetet financiare, strukturën ekonomike, specifikat e industrisë së naftës e gazit, si dhe identitetin historik e shoqëror të zonës.

Në letrën zyrtare të dërguar institucioneve ligjvënëse, komuniteti dhe përfaqësuesit e tij parashtrojnë kërkesat e tyre:

“Komuniteti i Patosit kërkon që, përpara çdo vendimmarrjeje për ndryshimin e statusit të kësaj bashkie ose për bashkimin e saj me Bashkinë Fier, të kryhet dhe të bëhet publike një analizë e plotë, objektive dhe e verifikueshme mbi: funksionalitetin e Bashkisë Patos; kapacitetin e saj administrativ; kapacitetin financiar; strukturën ekonomike të territorit; karakteristikat demografike; veçoritë gjeografike; aksesin e qytetarëve në shërbime; historinë administrative; identitetin shoqëror dhe kulturor; ndikimin e industrisë së naftës dhe gazit; kostot dhe përfitimet e një bashkimi të mundshëm me Fierin; alternativat ndaj bashkimit. Pozicioni i komunitetit është se Bashkia Patos duhet të ruhet si njësi e veçantë e vetëqeverisjes vendore.”

Përfaqësuesit e komunitetit të Patosit këmbëngulin se ruajtja e statusit të bashkisë si njësi e veçantë e vetëqeverisjes vendore është e domosdoshme për të garantuar mbrojtjen e interesave të qytetarëve dhe aksesin e tyre të drejtpërdrejtë në shërbimet publike.