ATHINË — Një shpërthim i fuqishëm ka tronditur qendrën e Athinës mëngjesin e së premtes, duke shkaktuar shembjen e një ndërtese dhe panik të madh te banorët e kalimtarët. Shpërthimi ka qenë aq i fortë sa është dëgjuar në pjesën më të madhe të kryeqytetit grek, ndërsa dyshimet e para lidhen me një rrjedhje të mundshme gazi.

Ekipet e emergjencës dhe Shërbimi Zjarrfikës kanë ndërhyrë menjëherë në zonën e Plakës, në rrugën Lysikratous, ku kanë bërë të mundur nxjerrjen nga rrënojat të dy grave. Të lënduarat janë transportuar me urgjencë në spital për të marrë ndihmën e nevojshme mjekësore.

Nga forca e shpërthimit kanë pësuar dëmtime materiale edhe ndërtesat ngjitur. Zjarrfikësit po punojnë për fikjen e flakëve dhe kontrollin e strukturave të dëmtuara për të parandaluar shembje të tjera, ndërsa forcat e policisë kanë rrethuar zonën për të garantuar sigurinë gjatë hetimit të shkaqeve të ngjarjes.