N JU-JORK — Kryeministri Edi Rama pritet të mbajë sot fjalimin e tij zyrtar në punimet e Asamblesë së Përgjithshme të Kombeve të Bashkuara në Nju-Jork, në kuadër të hapjes së debatit të përgjithshëm vjetor. Fjala e kreut të qeverisë shqiptare është parashikuar të mbahet në orën 17:00 me orën lokale të SHBA-së (ora 23:00 me orën e Shqipërisë).

Gjatë qëndrimit të tij në Shtetet e Bashkuara, Kryeministri ka zhvilluar një sërë takimesh zyrtare me përfaqësues të politikës, ekonomisë dhe organizatave ndërkombëtare, si dhe ka zhvilluar një bashkëbisedim me pjesëtarë të komunitetit shqiptar në Michigan.

Ndërkohë, vëmendja e opinionit publik është përqendruar te mesazhet kryesore që Rama do të përcjellë nga tribuna e OKB-së, ku mbetet për t’u parë nëse në fokus do të jetë edhe çështja e procesit gjyqësor ndaj ish-drejtuesve të Ushtrisë Çlirimtare të Kosovës.

Vizita e kreut të ekzekutivit në SHBA është shoqëruar gjithashtu me reagime dhe tubime proteste nga pjesëtarë të diasporës shqiptare, të cilët kanë shprehur kundërshtitë e tyre politike gjatë pranisë së tij në aktivitetet diplomatike.