Kërkesat për kapital të shoqërive të sigurimit në Shqipëri do të bazohen në profilin e rrezikut të veprimtarisë së tyre.

Edhe shpërndarja e produkteve të sigurimit do t’u nënshtrohet kërkesave të përforcuara për mbrojtjen e konsumatorit.

Këto ndryshime parashikohen në projektligjin e ri “Për veprimtarinë e sigurimit dhe risigurimit”.

Iniciativa u prezantua gjatë një takimi mes Drejtoreshës së AMF-së, Adela Xhemali, përfaqësuesve të Bankës Botërore dhe drejtuesve të shoqërive të sigurimit.

Sipas AMF-së, projektligji synon përafrimin e plotë me kuadrin evropian Solvency II dhe Direktivën për Shpërndarjen e Sigurimeve (IDD).

Drejtoresha Xhemali nënvizoi se reforma do të forcojë qëndrueshmërinë e tregut, standardet e qeverisjes, administrimin e rreziqeve dhe transparencën.

Eksperti i Bankës Botërore, Timo Broszeit, sqaroi se kuadri i ri e vendos qeverisjen korporative në thelb të regjimit ligjor.

Administrimi i rrezikut do të bëhet pjesë e vendimmarrjes strategjike, duke rritur përgjegjësinë e organeve drejtuese për qëndrueshmërinë financiare.

Drafti u hartua me mbështetjen e Bankës Botërore dhe financim nga SECO e qeverisë zvicerane.

Nga ana e tyre, përfaqësuesit e tregut të sigurimeve shprehën angazhimin për mbështetjen e reformës, me fokus te ngritja e kapaciteteve dhe digjitalizimi.