Ish-zëvendësministri i Brendshëm, Avenir Peka, ka paralajmëruar zhvillime të reja hetimore nga Prokuroria e Posaçme, duke deklaruar se pas ngjarjeve në SHISH, vëmendja e SPAK-ut do të zhvendoset drejt Kadastrës dhe Këshillit Kombëtar të Territorit.

Në një deklaratë të bërë në emisionin “Off the Record” në A2 CNN, Peka u shpreh se situata te Kadastra është mjaft e rëndë dhe se Këshilli Kombëtar i Rregullimit të Territorit, i cili drejtohet nga kryeministri, është kontrolluar nga agjentët e BKH-së dhe SPAK-ut gjatë periudhës së verës.

Peka theksoi se këto institucione janë tashmë në radarin e drejtësisë për shkak të drejtimit dhe emërimeve të drejtpërdrejta nga kreu i qeverisë.

Sipas tij, pas hetimit të procedurave në Kadastër dhe Këshillin e Territorit, çështja e radhës që pritet të marrë vëmendje do të jetë ajo e trafikut të armëve.