Detaje të reja janë zbardhur nga seanca me dyer të mbyllura në GJKKO për ish-drejtuesen e SHISH-it, Vlora Hyseni, e cila u paraqit pranë SPAK-ut e shoqëruar nga avokati i saj. Sipas gazetares Anila Hoxha në emisionin “Top Story”, seanca zgjati rreth një orë e tre minuta, gjatë së cilës prokurorët lexuan faktet dhe të dhënat e dyshuara që mbeten sekret shtetëror.

Gjatë seancës, Hyseni ka hedhur poshtë të gjitha akuzat dhe ka pretenduar se nga zyra e saj nuk ka dalë asnjë dokument i klasifikuar. Ajo i ka kërkuar gjykatës që telefoni i saj i sekuestruar të mos ekspertohet në laboratorët e SPAK-ut, por t’u nënshtrohet verifikimeve nga agjencitë partnere ndërkombëtare jashtë Shqipërisë.

Në lidhje me të dyshuarit e tjerë të përfshirë në çështje, shtetasi Emro Sulejmani ka deklaruar se e njihte Endri Agasin vetëm sepse ishte nga Durrësi dhe se e kishte ndihmuar me ushqime. Ndërsa përgjegjësi i laboratorit, Kalloshi, u shpreh se nuk i kujtohej të kishte dërguar informacione në telefonin e Agasit.

Gazetarja Anila Hoxha ngriti gjithashtu shqetësimin për një deklaratë shantazhuese e kërcënuese të ish-shefes së SHISH-it ndaj gazetares Klodiana Lala gjatë zhvillimeve në gjykatë. Pas përfundimit të seancës, Hyseni zgjodhi të largohej nga ambientet e SPAK-ut në heshtje të plotë, pa u përgjigjur pyetjeve të gazetarëve.