Qeveria ka hartuar projektligjin "Për krijimin, mbajtjen dhe menaxhimin e naftës bruto dhe nënprodukteve të saj", i cili parashikon vendosjen e një tarife të re orientuese prej 3 lekësh për litër mbi karburantet. Kjo masë do të rrisë më tej barrën fiskale mbi naftën, ku taksat aktualisht përbëjnë 53% të çmimit final të shitjes me pakicë, duke sjellë shtrenjtim të drejtpërdrejtë për konsumatorin vendas.

Fondet e mbledhura, të cilat llogariten në rreth 3.75 miliardë lekë (rreth 40 milionë euro) në vit ose 200 milionë euro gjatë një periudhe 5-vjeçare, do të përdoren për blerjen e naftës rezervë dhe mbulimin e kostove të depozitimit e mirëmbajtjes. Menaxhimi i kësaj rezerve do t’i besohet një Autoriteti të ri Shtetëror. Nisma ka nxitur reagimin e Shoqatës së Hidrokarbureve, e cila e konsideron këtë tarifë si një taksë të fshehtë mbi qytetarët, ndërsa ngre shqetësime për faktin se projektligji i jep këtij autoriteti të drejtën të blejë e të shesë naftë pa prokurim publik.