Presidenti i Republikës, Bajram Begaj, pritet të mbledhë të hënën e ardhshme Këshillin e Sigurisë Kombëtare në lidhje me zhvillimet rreth ish-drejtoreshës së SHISH-it, Vlora Hyseni. Mbledhja është caktuar në fillim të javës së ardhshme edhe për shkak të agjendës zyrtare të Kryeministrit Edi Rama, i cili ndodhet jashtë vendit dhe rikthehet në Shqipëri më 26 shtator.

Thirrja e Këshillit të Sigurisë Kombëtare vjen mes shqetësimeve mbi sigurinë e informacionit të klasifikuar, pas vendimit të Gjykatës së Posaçme Kundër Korrupsionit dhe Krimit të Organizuar (GJKKO). Më 21 shtator, me kërkesë të SPAK-ut, GJKKO-ja caktoi ndaj Hysenit masën e sigurisë "arrest në shtëpi" dhe "pezullim nga ushtrimi i një detyre apo shërbimi publik", në kuadër të hetimit për veprat penale "nxjerrje e sekretit shtetëror" dhe "përkrahje e autorit të krimit".