TIRANË – Gjykata e Posaçme e Shkallës së Parë për Korrupsionin dhe Krimin e Organizuar ka vendosur vazhdimin e zbatimit të masës së sigurisë “arrest në shtëpi” ndaj ish-drejtoreshës së SHISH, Vlora Hyseni.

Në njoftimin zyrtar, GJKKO bën me dije se më 23 shtator 2026, Prokuroria e Posaçme ka paraqitur pranë gjykatës kërkesën për marrjen në pyetje të personit nën hetim, Vlora Hyseni, ndaj së cilës ishte caktuar më herët masa e sigurimit “arrest në shtëpi”.

Pas shqyrtimit të kërkesës, me vendimin nr. 69, datë 24 shtator 2026, gjykata, me trup gjykues të përbërë nga gjyqtarja Flojera Davidhi, vendosi vazhdimin e zbatimit të masës së sigurimit personal “arrest në shtëpi”, të parashikuar nga neni 237 i Kodit të Procedurës Penale.

Në të njëjtin vendim, GJKKO ka vendosur edhe ndalimin e publikimit, tërësisht ose pjesërisht, të vendimit gjyqësor deri në përfundimin e hetimeve paraprake.

Vendimi është marrë në bazë të nenit 103 të Kodit të Procedurës Penale.

Njoftimi i plotë i GJKKO-së:

“Kërkuesi Prokuroria e Posaçme kundër Korrupsionit dhe Krimit të Organizuar, më datë 23.09.2026 ka paraqitur pranë gjykatës kërkesën për marrjen në pyetje të personit nën hetim Vlora Hyseni, ndaj së cilës është caktuar masa e sigurimit ‘Arrest në shtëpi’.

Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar, me trup gjykues të përbërë nga gjyqtarja Flojera Davidhi, me vendimin nr. 69, datë 24.09.2026, vendosi vazhdimin e zbatimit të masës së sigurimit personal me karakter shtrëngues ‘Arrest në shtëpi’, parashikuar nga neni 237 i K.Pr.Penale, ndaj personit nën hetim Vlora Hyseni.

Gjithashtu, gjykata, bazuar në nenin 103 të K.Pr.Penale, ka vendosur ndalimin e publikimit tërësisht apo pjesërisht të këtij vendimi gjyqësor deri në përfundim të hetimeve paraprake.”