Tiranë, 24 shtator 2026 – Është shtyrë sërish seanca paraprake në GJKKO ndaj ish-presidentit Ilir Meta dhe Monika Kryemadhit. Shkak këtë herë është bërë mungesa e gjyqtares Rudina Palloj, anëtare e trupit gjykues.

Në sallën e gjyqit ishin të pranishëm avokatët e Metës dhe Kryemadhit, por ata nuk morën pjesë në mbrojtjen e klientëve për shkak të bojkotit të vendosur nga Dhoma Kombëtare e Avokatisë.

Kryesuesi i trupit gjykues, Erjon Bani, i kërkoi avokatit të Ilir Metës, Bujar Musta, të shpjegonte përse nuk pranonte të përfaqësonte klientin e tij, pavarësisht se ndodhej në ambientet e gjykatës.

Musta deklaroi se Dhoma Kombëtare e Avokatisë ka marrë vendime për bojkotin e seancave dhe se ai rrezikon licencën nëse merr pjesë në proces, duke thyer vendimin e bojkotit.

Nga ana tjetër, gjyqtari Bani i bëri me dije avokatit se kjo situatë cenon administrimin e drejtësisë dhe iu referua nenit 264 të Kodit Penal, që lidhet me detyrimin për të marrë pjesë ose jo në grevë.

Gjatë seancës reagoi edhe Ilir Meta, i cili tha se situata e krijuar po cenon interesat e tij për zhvillimin e procesit gjyqësor. Sipas tij, avokati ndodhet përballë një konflikti mes detyrimit për të ushtruar mbrojtjen dhe rrezikut për licencën profesionale. Meta theksoi se vullneti i tij për të vijuar procesin është i plotë.

Në përfundim, seanca e radhës u caktua për 1 tetor, në orën 10:00.

Procesi ndaj Ilir Metës dhe Monika Kryemadhit vijon në fazën paraprake të gjykimit.