Tiranë, 24 shtator 2026 – Seanca plenare e Kuvendit është shoqëruar me tensione dhe përplasje mes deputetëve të opozitës dhe mazhorancës, ndërsa në qendër të debatit janë zhvillimet rreth ish-drejtoreshës së SHISH, Vlora Hyseni, dhe hetimeve që lidhen me biznesmenin Ergys Agasi.

Situata është tensionuar pasi deputeti i Partisë Demokratike, Flamur Noka, ka vijuar të qëndrojë në foltoren e Kuvendit edhe pas përfundimit të kohës së përcaktuar për fjalën e tij.

Kryetari i Kuvendit, Niko Peleshi, e ka paralajmëruar disa herë Nokën që të lironte foltoren, ndërsa më pas ka njoftuar se fjalën do ta merrte ministrja Ismailaj.

Refuzimi i Nokës për t’u larguar nga foltorja ka sjellë ndërprerjen e seancës. Në sallë, deputetë të opozitës kanë reaguar duke goditur tavolinat dhe kanë kërkuar dorëheqjen e kryeministrit Edi Rama.

Në nisje të përplasjes, debati ishte përqendruar te çështja e ish-kreut të SHISH dhe pretendimet e SPAK lidhur me favorizimin e biznesmenit Ergys Agasi gjatë kohës kur ky i fundit ishte në kërkim.

Pas përshkallëzimit të situatës, Peleshi ka njoftuar një pushim prej pesë minutash, duke pezulluar përkohësisht punimet e seancës plenare.