Toni Nake, 50 vjeç, është identifikuar si autori i dyshuar i plagosjes së rëndë të ndodhur mbrëmjen e sotme në rrugën "Marko Boçari" në Tiranë. Sipas të dhënave të reja, Nake ka goditur disa herë me mjet prerës në pjesën e barkut 49-vjeçarin Kreshnik Cara, pas një konflikti të çastit për motive të dobëta.

Falë ndërhyrjes së shpejtë të shërbimeve të Policisë së Shtetit, 50-vjeçari u kap dhe u vendos menjëhere në pranga. Ndërkohë, i dëmtuari Kreshnik Cara po merr ndihmën e nevojshme mjekësore në spital, ku i është nënshtruar ndërhyrjes kirurgjikale. Çështja i është kaluar Prokurorisë së Tiranës për veprime të mëtejshme hetimore.

Tiranë

Plagosi me mjet prerës 49-vjeçarin, falë reagimit të menjëhershëm të shërbimeve të Policisë, kapet dhe vihet në pranga autori i dyshuar.

Shërbimet e Policisë, menjëherë pas marrjes së njoftimit se në rrugën “Marko Boçari” ishte dëmtuar me mjet prerës shtetasi K. C., 49 vjeç, shkuan në vendngjarje për të sqaruar autorësinë dhe rrethanat e rastit.

Si rezultat i reagimit të menjëhershëm dhe veprimeve të shpejta hetimore e operacionale, u identifikua, u kap dhe u vu në pranga autori i dyshuar, shtetasi T. N., 50 vjeç.

Nga veprimet e deritanishme hetimore dyshohet se 50-vjeçari ka plagosur me mjet prerës 49-vjeçarin, pas një konflikti për motive të dobëta.

I dëmtuari ndodhet në spital, nën kujdesin e mjekëve.

Materialet procedurale iu referuan Prokurorisë, për veprime të mëtejshme”, thuhej në njoftim.