Detaje të reja janë zbardhur mbi ngjarjen e rëndë të ndodhur më 20 shtator në Baldissero d’Alba të provincës së Cuneos në Itali, ku mbeti i vrarë 36-vjeçari shqiptar Gjovalin Lasri.

Mediat italiane kanë publikuar regjistrimin e telefonatës me numrin e emergjencës 112 të autorit të ngjarjes, 35-vjeçarit Roberto Mollo, i cili punon si shofer kamioni. Gjatë telefonatës, Mollo dëgjohet t’i shpjegojë operatores se ka qëlluar 13 herë me armë zjarri pasi kishte parë persona të maskuar në oborrin e shtëpisë së tij në rikonstruksion, duke deklaruar: "Mirëmbrëma, jam Roberto Mollo. Kam pasur hajdutë në shtëpi, unë u mbrojta… njëri ka vdekur. Kam pasur frikë, jam i dëshpëruar".

Trupi i 36-vjeçarit shqiptar u gjet pranë daljes së oborrit, i pajisur me kapuç, doreza, elektrik dore, si dhe me një kaçavidë e rreth 2 mijë euro cash në xhepa.

Grupi hetimor ka ngritur dyshimet se viktima mund të jetë pjesë e një bande në lëvizje të specializuar për vjedhje të njëpasnjëshme banesash, ndërsa po verifikohet prejardhja e shumës së parave të gjetura me vete për të përcaktuar nëse lidhen me grabitje të tjera të kryera po atë natë.