Një ngjarje e rëndë ka ndodhur mbrëmjen e sotme në kryeqytet, pranë shkollës "Petro Nini", ku një person ka mbetur i plagosur me armë të ftohtë.

I plagosuri është Kreshnik Cara, 49 vjeç, banues në Tiranë, raporton noa.al. Raportohet se gjendja e tij është kritike.

Policia tha se identifikua, u kap dhe u vu në pranga autori i dyshuar, shtetasi Toni Nake, 50 vjeç.

I dëmtuari është transportuar me urgjencë drejt spitalit me plagë të marra në pjesën e barkut dhe aktualisht po i nënshtrohet një ndërhyrjeje kirurgjikale nga ekipet mjekësore.

Autoritetet policore kanë bërë të mundur identifikimin e menjëhershëm të autorit të dyshuar dhe kanë ngritur pika të shumta kontrolli në terren për kapjen e tij, ndërsa vijojnë hetimet për zbardhjen e plotë të rrethanave dhe motivit të kësaj ngjarjeje.

Çfarë thotë policia

Tiranë

Plagosi me mjet prerës 49-vjeçarin, falë reagimit të menjëhershëm të shërbimeve të Policisë, kapet dhe vihet në pranga autori i dyshuar.

Shërbimet e Policisë, menjëherë pas marrjes së njoftimit se në rrugën “Marko Boçari” ishte dëmtuar me mjet prerës shtetasi K. C., 49 vjeç, shkuan në vendngjarje për të sqaruar autorësinë dhe rrethanat e rastit.

Si rezultat i reagimit të menjëhershëm dhe veprimeve të shpejta hetimore e operacionale, u identifikua, u kap dhe u vu në pranga autori i dyshuar, shtetasi T. N., 50 vjeç.

Nga veprimet e deritanishme hetimore dyshohet se 50-vjeçari ka plagosur me mjet prerës 49-vjeçarin, pas një konflikti për motive të dobëta.

I dëmtuari ndodhet në spital, nën kujdesin e mjekëve.

Materialet procedurale iu referuan Prokurorisë, për veprime të mëtejshme.