Autoritetet italiane kanë arrestuar 47-vjeçarin Alok Mittra, i cili rezultonte i shpallur në kërkim ndërkombëtar nga drejtësia shqiptare pas dënimit me 15 vite burgim nga Gjykata e Posaçme në vitin 2024. Mittra u shpall fajtor për përfshirje në grup të strukturuar kriminal, falsifikim dokumentesh dhe ndihmë për kalim të paligjshëm të kufijve, si pjesë e një rrjeti që organizonte trafikimin e shtetasve të huaj drejt Bashkimit Evropian.

Hetimet zbuluan se gjatë periudhës 2023–2024, grupi kriminal solli në Shqipëri nga Dubai rreth 253 shtetas nga Bangladeshi, duke u siguruar atyre leje qëndrimi përmes kontratave fiktive të punës për të lehtësuar kalimin e mëtejshëm drejt vendeve të BE-së. Në këtë veprimtari, 47-vjeçari kishte rolin e shoqërimit, transportit dhe akomodimit të emigrantëve. Pas kapjes në Itali, autoritetet kanë nisur procedurat zyrtare për ekstradimin e tij drejt Shqipërisë ku do të kryejë dënimin e dhënë.