Pjesëtarë të shumtë të diasporës shqiptare në Shtetet e Bashkuara të Amerikës janë mbledhur ditën e sotme në një protestë paqësore përpara selisë së OKB-së në Nju-Jork, duke shprehur revoltën e tyre ndaj vendimit të Dhomave të Specializuara në Hagë. Me flamuj kombëtarë shqiptarë dhe amerikanë në duar, protestuesit mbanin pankarta me thirrje si "Lironi heronjtë tanë", "Drejtësi, jo politikë" dhe "Jo në emrin tim", ndërsa kërkuan rishikimin e menjëhershëm të procesit gjyqësor dhe lirimin e Hashim Thaçit, Kadri Veselit, Jakup Krasniqit e Rexhep Selimit. Kjo demonstratë në SHBA pason valën e protestave masive të zhvilluara gjatë ditëve të fundit në Kosovë, Gjermani, Zvicër, Austri e Kanada.

Revolta e diasporës vjen pas vendimit të marrë më 16 shtator nga Gjykata Speciale në Hagë, e cila i dënoi katër ish-drejtuesit e UÇK-së me një total prej 81 vitesh burgim në shkallë të parë, nën akuzat për krime lufte, trajtim mizor e ndalim arbitrar. Në aktgjykimin e saj, trupi gjykues dënoi Hashim Thaçin dhe Jakup Krasniqin me nga 25 vite burg, Kadri Veselin me 18 vite dhe Rexhep Selimin me 13 vite burgim. Megjithatë, trupi gjykues konstatoi se Prokuroria e Ethem nga ana tjetër dështoi të provonte ekzistencën e një sulmi të përhapur apo sistematik ndaj popullatës civile, duke rrëzuar kështu akuzat për krime kundër njerëzimit.