Shkarkimi i Vlora Hysenit, Rama i delegon kompetencat drejtorit të përkohshëm të Shërbimit Informativ Shtetëror 

TIRANË — Pas vendimit të Gjykatës së Posaçme për caktimin e masës së sigurisë “arrest në shtëpi” dhe pezullimin nga detyra të Vlora Hysenit, drejtimi i Shërbimit Informativ të Shtetit (SHISH) i është besuar përkohësisht Elvis Lilës, i cili mban pozicionin e Drejtorit të Departamentit Operativ në këtë institucion.

Sipas urdhrit zyrtar të nxjerrë për këtë qëllim, Lilës i janë deleguar të gjitha kompetencat administrative të titullarit deri në emërimin e drejtuesit të ri të shërbimit sekret.

Vendimi bazohet në Kushtetutë e në legjislacionin në fuqi për SHISH-in dhe ka hyrë në fuqi menjëherë.

Procesi i ekzekutimit të masës së sigurisë ndaj Vlora Hysenit nisi me ndalimin e saj në aeroportin e Prishtinës, ku iu dorëzua autoriteteve të Kosovës dhe më pas u shoqërua drejt pikës kufitare të Vërmicës.

Në kufi me Kukësin, ajo iu dorëzua autoriteteve shqiptare, të cilat me automjet civil e shoqëruan drejt Tiranës për zbatimin e arrestit në shtëpi, nën akuzat për nxjerrje të të dhënave sekrete dhe përkrahje të autorit të krimit.