TIRANË — Deputeti i Partisë Demokratike, Gent Strazimiri, ka komentuar aksionin e fundit të SPAK-ut dhe masën e sigurisë të vendosur ndaj drejtueses së pezulluar të Shërbimit Informativ të Shtetit (SHISH), Vlora Hyseni.

Gjatë fjalës së tij në Komisionin e Ligjeve, Strazimiri deklaroi se drejtuesja e shërbimit sekret dyshohet se ndihmoi me informacione të klasifikuara shtetërore biznesmenin Ergys Agasi gjatë kohës që ky i fundit ndodhej në kërkim.

Lidhur me qëndrimin e tij mbi goditjen e SPAK-ut ndaj drejtueses së SHISH-it, Gent Strazimiri u shpreh:

“Në 36 vjet mezi prisnim që Prokuroria të arrestonte drejtorin e SHISH, që për arsye sentimentale, në disa vende ku nuk duhet të ishte, i ka dhënë dashnorit sekretet e shtetit. Nëse mezi prisnim këtë lajm që shteti po funksionon më në fund, që më në fund të kishim një drejtor shërbimi sekret që i shiste sekretet e shtetit skutave, ky është lajm i madh. Duhet ta diskutojmë. Skandal në 36 vjet dhe tregon degjenerimin e institucioneve të shtetit. Ka 15 vjet që nuk ekziston ky shtet, nuk ka rënë dje. Na është përplasur në fytyrë se shteti nuk ekziston, është në duart e krimit. Na ka kapur Prokuroria shefen e shërbimit sekret duke tregtuar në epshe e sipër sekretet e shtetit.”

Deklaratat e deputetit të opozitës vijnë pas vendimit të GJKKO-së për caktimin e masës së sigurisë "arrest në shtëpi" dhe pezullimin nga detyra për Vlora Hysenin, lidhur me hetimet për nxjerrje të akteve sekrete dhe përkrahje të autorit të krimit.