Mjeti përplaset me biçikletën në aksin Lushnjë-Fier, drejtuesi në spital

LUSHNJË — Një aksident rrugor është regjistruar në aksin nacional Lushnjë-Fier, në afërsi të vendit të njohur si “Pushimi i Shoferit”, ku një automjet i llojit Benz ka përplasur një person që po udhëtonte me biçikletë.

Si pasojë e goditjes nga automjeti ka mbetur i plagosur drejtuesi i biçikletës, shtetasi i moshuar Josif Pane.

I dëmtuari është transportuar menjëherë drejt spitalit të Lushnjës për të marrë ndihmën e nevojshme mjekësore.

Burime mjekësore bëjnë me dije se pavarësisht frakturave të pësuara, i moshuari ndodhet jashtë rrezikut për jetën.

Sipas dëshmisë së drejtuesit të automjetit, biçiklisti i ka prerë rrugën duke lëvizur në krah të kundërt me korsinë e qarkullimit.

Shoferi ka deklaruar se kishte ulur shpejtësinë për shkak të kalimit në zonën e kryqëzimit, kur biçikleta është përplasur papritur në pjesën e përparme të makinës.

Forcat e Policisë së Shtetit kanë mbërritur në vendngjarje dhe kanë nisur veprimet hetimore për zbardhjen e plotë të rrethanave dhe dinamikës së aksidentit.