TIRANË — Agjencia e Trajtimit të Pronave (ATP) do të nisë gjatë muajit tetor procesin e shpërndarjes së fondeve financiare për pronarët e prekur nga ndërtimet informale. Drejtori i institucionit, Valdrin Pjetri, zbardhi detajet e procedurave administrative për shqyrtimin e dosjeve të shpronësimit dhe modelin e ri të informimit publik.

Gjatë fjalës së tij, Pjetri sqaroi se nga rreth 6 mijë dosje të mbetura për shqyrtim, rreth 1 800 prej tyre ndodhen aktualisht në proces përpunimi. Ai vuri në dukje se vonesat kryesore në trajtimin e aplikimeve lidhen me sigurimin e dëshmive të trashëgimisë, mungesën e firmave mes familjarëve të brezit të tretë të trashëgimtarëve, si dhe me mospërputhjet hartografike.

Lidhur me ecurinë e procesit të kompensimit dhe sfidat me dokumentacionin, Valdrin Pjetri u shpreh:

“Ne po trajtojmë brezin e tretë që është në moshë 75-80, dhe mezi arrijnë të marrin firma nga familjarët e tjerë. Po ashtu konstatohen dhe probleme hartografike. Dosjet janë rast pas rasti. Mungon marrja e firmave, dëshmia e trashëgimisë, ky është problemi i parë. Agjencia e Trajtimit të Pronave ka kompensim fizik dhe financiar. Financiari është i menjëhershëm. Kur një qytetar i një subjekti të shpronësuar merr vendim nga Trajtimi i Pronave, ai ka mbaruar punë, dhe nuk ka pse të kthehet më te ne. Sot qytetarët janë të prirur të kompensimi financiar. Kur është e pamundur kompensimi fizik, Agjencia kalon te kompensimi financiar. Ne bëjmë plan punë dhe çdo datë 30 ATP do të ketë një kalendar pune, për të treguar punën e kryer. Në çdo fund muaji, në web, në instagram apo FB ne do të dalim me rezultate konkrete për punën. Qytetari ka mundësi që të pyesë fizikisht ditët e mërkura për dosjen e tij ose me shkresë, drejtuar institucionit tonë. Kemi 6 mijë dosje në total për të shqyrtuar. 1800 janë duke u përpunuar përditë. Analizën e parë të punës do ta bëjmë pas 6 muajsh. Në vitin 2027 do të quhen të trajtuara dosjet në proces shqyrtimi. Ndërsa kompensimi është proces i vazhdueshëm. Në tetor do të bëjmë shpërndarjen e fondeve për ata pronarë që janë prekur nga ndërtimet informale. Kemi mbështetjen e Ministrisë së Drejtësisë dhe të Financave për të bërë likuidimin e subjekteve që duhet të kompensohen. Ne bëjmë mesazhin; vijoni plotësimin e dokumentacioneve në bazë të njoftimeve të bëra nga institucioni ynë.”

Kreu i Agjencisë së Trajtimit të Pronave nënvizoi se në bashkëpunim me Ministrinë e Drejtësisë dhe Ministrinë e Financave po garantohet likuidimi i subjekteve përfituese, ndërsa i bëri thirrje qytetarëve të vijojnë plotësimin e dokumentacionit përkatës pranë institucionit.