Shqipëria renditet ndër vendet e para në Evropë ku kostoja e lartë financiare pengon qytetarët të marrin shërbimet e nevojshme shëndetësore. Sipas të dhënave të publikuara nga Eurostat, 8% e popullsisë shqiptare mbi 16 vjeç kanë deklaruar se nuk kanë kryer një ekzaminim mjekësor për shkak të pamundësisë financiare. Ky tregues e vendos Shqipërinë të dytën në Evropë, menjëherë pas Greqisë me 8.8%, ndërsa lë pas mesataren e Bashkimit Evropian që qëndron në vetëm 1%, si dhe të gjitha vendet e Ballkanit Perëndimor ku kjo pengesë prek më pak se 1.2% të popullsisë.

Përveç faktorrit financiar, që mbetet pengesa kryesore, qytetarët shqiptarë përballen edhe me vështirësi të tjera organizative e personale për kryerjen e kontrolleve mjekësore. Në total, 14.9% e popullsisë në vend ka raportuar të paktën një nevojë të paplotësuar shëndetësore, ku përveç kostos ndikojnë listat e gjata të pritjes (1.5%), dëshira për të pritur përmirësimin e vetvetishëm të problemit (2%), si dhe mungesa e kohës apo largësia nga qendrat spitalore.

Sipas të dhënave plotësuese të Bankës Botërore, kjo situatë reflekton mbulimin e ulët publik të shpenzimeve shëndetësore në vend. Familjet shqiptare paguajnë nga xhepi i tyre rreth 48.27% të shpenzimeve totale për shëndetësinë, që përbën nivelin më të lartë në Evropë, ndërkohë që konsumi real për frymë për mallra dhe shërbime shëndetësore në Shqipëri arrin në vetëm 40% të mesatares Evropiane.