Një tjetër vatër zjarri me përmasa të mëdha ka përfshirë zonën e Shën Pjetrit në Gjirin e Lalzit vonë në mbrëmjen e së martës, ku flakët janë përhapur me shpejtësi të madhe të favorizuara nga era e fortë.

Për shkak të rrezikut të drejtpërdrejtë që kanosej, autoritetet kryen me urgjencë evakuimin e plotë të pushuesve në një kompleks turistik pranë vatrës, si dhe të banorëve të një shtëpie private aty pranë.

Forcat zjarrfikëse të Bashkisë Durrës dhe strukturat e emergjencave civile po zhvillojnë një operacion intensiv me kapacitete të shumta logjistike e njerëzore për të lokalizuar flakët.

Ndërhyrja e ekipeve operacionale po vijon pa ndërprerje në kushte të vështira terreni, me qëllim izolimin e të gjitha vatrave dhe mbrojtjen e strukturave të banimit e turizmit në zonë.

Autoritetet u kanë bërë thirrje qytetarëve dhe vizitorëve që të shmangin lëvizjet e panevojshme drejt zonës së prekur dhe të ndjekin udhëzimet e tyre.