Kryetari i Grupit Parlamentar të Partisë Socialiste, Taulant Balla, ka reaguar publikisht pas dekretimit të shkarkimit të Vlora Hysenit nga detyra e drejtoreshës së SHISH-it nga Presidenti Bajram Begaj. Përmes një postimi në rrjetet sociale, Balla nëvizoi se shumica qeverisëse mbetet e palëkundur në parimin e saj për të mos ndërhyrë në punët e drejtësisë dhe për të mos marrë në mbrojtje asnjë zyrtar të përfshirë në hetime penale.

Në deklaratën e tij, Balla u shpreh se çdo individ mban përgjegjësi personale para ligjit: "Shumica jonë qeverisëse i mbetet besnike qëndrimit standard për të mos hyrë në meritën e asnjë çështjeje të drejtësisë. Kushdo qoftë duhet të përballet personalisht me drejtësinë dhe të marrë avokatin e vet. Partia Socialiste, pra shumica qeverisëse e këtij vendi, nuk bën avokatin e askujt". Ai shtoi gjithashtu se shkarkimi i menjëhershëm i Hysenit u bë me qëllim që t’i hapet rrugë emërimit pa vonesë të një drejtuesi të ri në krye të Shërbimit Informativ të Shtetit.