Ministri i Punëve të Jashtme i Kosovës, Glauk Konjufca, ka zhvilluar një takim me homologun e tij holandez, Tom Berendsen, gjatë punimeve të Asamblesë së Përgjithshme të OKB-së në Nju Jork. Gjatë këtij bashkëbisedimi, kryediplomati kosovar ngriti çështjen e aktgjykimit të shkallës së parë nga Dhomat e Specializuara ndaj ish-udhëheqësve të UÇK-së, Hashim Thaçit, Kadri Veselit, Rexhep Selimit dhe Jakup Krasniqit, duke e cilësuar atë si një vendim që deformon të vërtetën.

Në deklaratën e tij pas takimit, Konjufca theksoi vendosmërinë e institucioneve të Kosovës për kërkimin e drejtësisë gjatë procesit të apelimit: "I shpreha qëndrimin tonë se ky aktgjykim shtrembëron të vërtetën historike, përbën një padrejtësi serioze dhe duhet të korrigjohet në shkallën e Apelit". Ky takim ishte pjesë e një sërë bashkëbisedimesh diplomatike që delegacioni i Kosovës po zhvillon me përfaqësues ndërkombëtarë në SHBA.