Gjykata ka urdhëruar sekuestrimin e dy objekteve të përdorura për shërbime hotelerie. Ekzekutimi i plotë i vendimit do të bëhet më 6 tetor, pasi në hotel kishte ende pushues të akomoduar

Sarandë – Dy objekte të ndërtuara pa leje dhe të përdorura për shërbime hotelerie janë sekuestruar në Ksamil, ndërsa pronari i tyre është vendosur në masën e sigurisë “arrest në shtëpi”.

Bëhet fjalë për një objekt 5-katësh dhe një tjetër 1-katësh, të ndërtuara në lagjen nr. 2, në rrugën “Derolli”.

Sipas Policisë, objektet ishin ngritur pa leje me qëllim përfitimi dhe përdoreshin për aktivitet hotelier.

Gjykata e Sarandës ka vendosur sekuestrimin e tyre, ndërsa ndaj pronarit, shtetasit K. P., është caktuar masa “arrest në shtëpi” për veprën penale “Ndërtimi i paligjshëm”.

Gjatë procedurave për zbatimin e vendimit është konstatuar se hoteli ishte ende në funksion dhe në të ndodheshin pushues të akomoduar.

Për këtë arsye, ekzekutimi i plotë i vendimit është shtyrë, ndërsa autoritetet kanë njoftuar se më 6 tetor 2026 do të kryhen veprimet përfundimtare për marrjen në administrim të objekteve.