Aktori i njohur amerikan Sylvester Stallone ka deklaruar se nuk e pranoi rolin e “ambasadorit special” për Hollywood-in, të cilin presidenti amerikan Donald Trump e kishte njoftuar në janar të vitit 2025.

Në një intervistë, Stallone tha se ishte informuar për emërimin përmes televizionit dhe se nuk ishte pyetur paraprakisht nëse dëshironte ta merrte përsipër këtë detyrë.

Aktori shpjegoi se e konsideronte të vështirë ndërhyrjen në funksionimin e industrisë së Hollywood-it, të cilën e përshkroi si një sistem kompleks me struktura dhe interesa të ndryshme.

Sipas Stallone, Trump synonte të rikthente aktivitetin dhe ndikimin e industrisë amerikane të filmit, por aktori bëri të ditur se nuk do ta merrte përsipër rolin e ofruar.

“Faleminderit dhe ciao”, ishte në thelb përgjigjja e tij ndaj propozimit.

Pavarësisht refuzimit të detyrës, Stallone ka folur pozitivisht për Trumpin gjatë intervistave të tij.

Aktori e ka përshkruar presidentin amerikan si një figurë me përmasa “mitike” dhe ka shprehur vlerësimin e tij për disa prej arritjeve të Trumpit.

Stallone mbetet një prej emrave më të njohur të kinematografisë amerikane, veçanërisht për rolet e tij në seritë filmike “Rocky” dhe “Rambo”.