TURGUTLU — Të paktën 11 nxënës kanë mbetur të plagosur si pasojë e të shtënave me armë zjarri pranë shkollës së mesme profesionale dhe teknike “Inci Uzmez” në qytetin Turgutlu, në provincën Manisa të Turqisë. Ngjarja e rëndë është regjistruar gjatë orëve të mëngjesit të së martës, rreth orës 08:00.

Sipas të dhënave zyrtare, dy prej nxënësve të lënduar ndodhen në gjendje të rëndë shëndetësore. Ministri turk i Drejtësisë, Akın Gurlek, konfirmoi se autori i dyshuar i ngjarjes është kapur dhe prangosur nga forcat e policisë menjëherë pas sulmit.

Nga raportimet e mediave vendase mësohet se i dyshuari është një 15-vjeçar, nxënës i klasës së nëntë, ndonëse mosha e tij pret ende konfirmimin zyrtar nga autoritetet. Në kuadër të veprimeve hetimore, policia ka marrë në pyetje edhe prindërit dhe gjyshin e të riut.

Prokuroria lokale ka nisur hetimet për zbardhjen e plotë të rrethanave dhe motivit të ngjarjes, ndërsa organet ligjzbatuese po ekzaminojnë edhe pretendimet se i riu mund të ketë qenë viktimë e bullizmit në ambientet shkollore. Ngjarja ka rikthyer shqetësimet mbi nivelin e sigurisë në shkollat turke, pas disa incidenteve të ngjashme të regjistruara në vend gjatë muajve të fundit.