TIRANË — Kryetari i Partisë Demokratike, Sali Berisha, ka rikthyer denoncimet e tij të mëparshme ndaj drejtueses së Shërbimit Informativ të Shtetit (SHISH), Vlora Hyseni, pas masës së sigurisë të vendosur ndaj saj nga Gjykata e Posaçme me kërkesë të SPAK-ut.

Në një deklaratë për mediat, Berisha u ndal te historiku i drejtimit të SHISH-it dhe aktiviteti i Hysenit përpara emërimit të saj në krye të institucionit të inteligjencës, duke pretenduar se institucioni u izolua nga partnerët ndërkombëtarë që pas largimit të ish-drejtorit Helidon Bendo.

Lidhur me historikun e emërimit dhe aktivitetin e Vlora Hysenit, Sali Berisha u shpreh:

“Natyrisht, shërbimi informativ kombëtar është një institucion i një rëndësie të jashtëzakonshme për sigurinë kombëtare. Fillimisht pas të themi largimit të detyruar, gjoja për studime të ish-shefit të shërbimit, Helidon Bendo, në shërbim u dërgua këshilltari i tij, famëziu Kashani, i cili në aktin më të parë, i urdhëruar nga Rama, urdhëroi punonjësit të ndërpresin çdo bashkëpunim me shërbimet partnere. Rast unik. Koreja e Veriut mund ta kishte një urdhër të tillë. Por, ndërkohë famozja Hyseni ishte në atë kohë këshilltare e Edi Ramës për shërbimet inteligjente. Ky është denoncim në vitin 2022. Më 24 dhjetor 2022. Burime shumë të besueshme informojnë se sapo mori detyrën, Vlora Hyseni e shkarkuar nga qeveria e Kosovës sepse plaçkiti të dhënat e shërbimit dhe i dërgoi në adresë të armiqve të Kosovës, emërohet drejtoreshë dhe vizitën e parë, sipas burimeve direkt të kryeministrisë, e bëri në Beograd ku qëndroi mbi 10 ditë. E kam konsideruar në atë kohë një kërcënim serioz për NATO-n, pasi shërbimet inteligjente të NATO-s ndajnë informacione me shërbimet inteligjente të vendeve anëtare dhe natyrisht në duart e saj ato kanë shkuar në drejtim të padronëve të saj.”

Reagimi i tij pason veprimet e fundit të SPAK-ut dhe BKH-së, ku pas kontrolleve të ushtruara u zbulua nxjerrja e dokumenteve të klasifikuara sekrete nga shërbimi informativ.