TIRANË — Kryetari i Partisë Demokratike, Sali Berisha, ka reaguar publikisht pas lëshimit të masës së sigurisë nga organet e drejtësisë ndaj drejtoreshës së Shërbimit Informativ të Shtetit (SHISH), Vlora Hyseni, në kuadër të hetimeve të SPAK-ut për dosjen e AKSHI-t.

Berisha e cilësoi këtë zhvillim si një akt të paprecedentë në historinë e institucioneve të inteligjencës, duke e akuzuar drejtuesen e SHISH-it për shkelje të betimit dhe tradhti ndaj detyrës shtetërore.

Lidhur me urdhërarrestin e lëshuar nga prokuroria, Sali Berisha deklaroi:

“Në histori keni lexuar, keni dëgjuar që shefat e shërbimeve të kenë punuar në kundërshtim me ligjet për diktatorë, për agjenci të tjera, por kjo është hera e parë që dëgjoni se shefja e shërbimit në një vend ishte në funksion dhe mbështetje të krimit. Sot prokuroria ka lëshuar urdhër arrest për Vlora Hysenin, shefen e shërbimit informativ kombëtar si bashkëpunëtore në krim, si njeri që ka shkelur betimin, ligjin dhe sekretet e shërbimit ua ka dhënë kriminelëve. Nuk ka nivel më të ulët tradhtie ndaj detyrës, ndaj ligjit se ky.”

Deklarata e liderit të opozitës pason veprimet e fundit hetimore të Byrosë Kombëtare të Hetimit, të cilat zbardhën nxjerrjen e materialeve të klasifikuara sekrete nga SHISH-i dhe çuan në lëshimin e urdhërarresteve për zyrtarë e ish-zyrtarë të lartë të policisë dhe inteligjencës.