ZVËRNEC — Delegacioni i eurodeputetëve që ndodhet në Shqipëri në kuadër të punimeve të Komitetit Parlamentar të Stabilizim-Asociimit Shqipëri-BE ka udhëtuar drejt zonës së Zvërnecit, aty ku parashikohet të zbatohet një projekt i madh turistik.

Me të mbërritur në terren, përfaqësuesit e Parlamentit Evropian janë përballur me protestën e banorëve të zonës, të cilët kanë kërkuar që shqetësimet e tyre për mbrojtjen e pronave dhe mjedisit të dëgjohen nga delegacioni ndërkombëtar. Banorët kanë lëshuar thirrje kundër tjetërsimit të pronave e mjedisit, mes të cilave spikati pankarta dhe thirrja kryesore “Shqipëria nuk është në shitje”.

Vizita e eurodeputetëve në këtë zonë të mbrojtur zhvillohet në një kohë kur Parlamenti Evropian pret nga Shqipëria rishikimin dhe ndryshimin e ligjit për zonat e mbrojtura, si pjesë e zbatimit të rezolutës përkatëse dhe detyrimeve që lidhen me procesin e negociatave për anëtarësim në Bashkimin Evropian.