DHËRMI — Pesë persona që rrezikonin mbytjen në detin Jon kanë shpëtuar pas ndërhyrjes së menjëhershme të shërbimeve të Policisë Kufitare.

Mjeti lundrues i llojit gomone po udhëtonte nga Dhërmiu në drejtim të Porto Palermos kur pësoi defekt teknik, duke mbetur pa mundësi manovrimi.

Pas marrjes së sinjalizimit për avarinë, forcat e Policisë Kufitare u nisën me urgjencë drejt vendngjarjes, ku lokalizuan gomonen dhe i erdhën në ndihmë drejtuesit e katër pasagjerëve në bord. Të pesë shtetasit u evakuuan me mjetin e policisë dhe u shoqëruan të sigurt deri në breg.

Të gjithë personat e shpëtuar ndodhen në gjendje të mirë shëndetësore. Policia Kufitare apeloi ndaj të gjithë drejtuesve të mjeteve lundruese që të tregojnë kujdes të shtuar, të kontrollojnë gjendjen teknike të mjeteve dhe të marrin parasysh kushtet atmosferike përpara se të dalin në det.