TIRANË — Aksioni i Prokurorisë së Posaçme Antikorrupsion (SPAK) që çoi në caktimin e masës së sigurisë “arrest në shtëpi” për drejtoreshën e SHISH-it, Vlora Hyseni, si dhe kontrollet në banesën e ish-Drejtorit të Përgjithshëm të Policisë së Shtetit, Ilir Proda, kanë nxitur reagime të ashpra nga përfaqësuesit e opozitës.

Kryetari i Grupit Parlamentar të Partisë së Lirisë, Tedi Blushi, e cilësoi ngjarjen si një skandal të përmasave të jashtëzakonshme që cenon drejtpërdrejt sigurinë kombëtare dhe dëshmon kapjen e institucioneve kyçe nga rrjetet kriminale.

Lidhur me zhvillimet e fundit, Tedi Blushi u shpreh:

“Shporrja e Edi Ramës është më shumë se kurrë emergjencë kombëtare. Shteti ka rënë! Siguria kombëtare ka rënë! SHISH dhe Policia në duart e Gysit dhe Mbrojtja në duart e Ronit është zyrtarizim i kapjes së shtetit në çdo qelizë nga mafia! Skandal i përmasave të jashtëzakonshme që kërkor reagim të fuqishëm kombëtar! Mafia ka sot shtetin e vet, por shteti duhet t’u kthehet shqiptarëve! Me çdo çmim!”

Nga ana tjetër, deputetja e Partisë Demokratike, Jorida Tabaku, theksoi se këto hetime që prekin kupolën e drejtimit të sigurisë tregues të kalbëzimit të sistemit nga brenda. Tabaku i kërkoi zyrtarisht Presidentit të Republikës të thërrasë me urgjencë Këshillin e Sigurisë Kombëtare, ndërsa përgjegjësinë politike për përzgjedhjen e këtyre drejtuesve ia faturoi drejtpërdrejt kryeministrit. Deputetja demokrate kërkoi që drejtësia të veprojë pa pengesa e pa mbrojtje politike për të gjithë zyrtarët e përfshirë në dosjen e AKSHI-t.