TIRANË — Bizneset që kanë detyrime të papaguara në dogana do të përfitojnë nga një kufi maksimal për kamatvonesat, në kuadër të projektligjit të ri për ndryshimin e Kodit Doganor. Përmes kësaj pakoje ligjore, Ministria e Financave parashikon se shuma e kamatvonesës nuk do të mund të kalojë vlerën e vetë detyrimit bazë të importit apo eksportit mbi të cilin ajo llogaritet, me synim lehtësimin e pagesës së borxhit doganor. Kjo masë nuk do të ketë efekt prapaveprues dhe do të zbatohet vetëm për vendimet që do të merren pas hyrjes në fuqi të ligjit.

Ndryshimet e reja synojnë gjithashtu shmangien e paqartësive dhe interpretimeve subjektive nga strukturat doganore lidhur me shkeljet administrative. Për këtë qëllim, shfuqizohen normat e dyfishta dhe rishikohen kriteret e vlerësimit, duke i ndarë qartë kundërvajtjet në shkelje me efekt financiar dhe pa efekt financiar. Sanksionet do të udhëhiqen nga parimi i proporcionalitetit dhe dekurajimit, ndërsa në raste të caktuara mund të përfshijnë edhe pezullimin apo revokimin e autorizimeve për subjektet.

Lidhur me aspektet procedurale dhe lehtësitë e tjera, projektligji riformulon rregullat e ankimit administrativ e gjyqësor, si dhe parashikon heqjen e kërkesës për garanci doganore për mallrat tregtare e jotregtare me vlerë deri në 1,000 euro ose peshë neto deri në 1,000 kilogramë. Gjithashtu, zgjerohet njohja e statusit të Operatorit Ekonomik të Autorizuar (AEO) për subjektet e huaja mbi bazë reciprociteti, si dhe përcaktohet se kursi zyrtar i këmbimit për vlerën doganore do të fiksohet mbi bazën e publikimit të Bankës së Shqipërisë në të mërkurën e parafundit të çdo muaji.

Pakoja ligjore prej 83 nenesh synon përafrimin e mëtejshëm të legjislacionit vendor me Kodin Doganor të Bashkimit Evropian, digjitalizimin e shërbimeve dhe përgatitjen e vendit për integrimin në Konventën e Transitit të Përbashkët. Nisma pritet të hyjë në fuqi 15 ditë pas botimit në Fletoren Zyrtare.